सुखड । संघर्षपुर्ण जित निकाल्दै लम्की फुटसल एण्ड ट्रेनिङ्ग सेन्टर यहाँ जारी प्रथम वडा अध्यक्ष कप यु–२० फुटबल प्रतियोगिताको फाइनलमा प्रवेश गरेको छ ।

बुधबार भएको पहिलो सेमिफाइनलतर्फ लम्की फुटसलले घरेलु टोली घोडाघोडी क्लबलाई टाईब्रेकरमा हराउँदै उपाधि नजिक पुगेका हो । निर्धारित समयको खेल गोलरहित बराबरीमा टुंगिएपछि टाईब्रेकरमा लम्की फुटसल ५–४ ले विजयी बन्यो ।

खेलमा लम्की फुटसलका डेविड बिष्ट म्यान अफ दि म्याच घोषित भए । प्रतियोगिता अन्तर्गत चैत्र २१ गते बिहीबारको दोस्रो सेमिफाइनल खेल बाघमारा स्पोर्टस क्लब र मसुरिया फुटबल एकेडेमीबीच हुने आयोजकले जानकारी दियो ।

घोडाघोडी क्लब, सुखड, कैलालीको आयोजनामा जारी प्रतियोगिताको विजेताले उपाधिसहित नगद ५० हजार हात पार्नेछ भने उपविजेताले ३५ हजार प्राप्त गर्नेछ । फाइनल खेल यही चैत्र २३ गतेका दिन हुनेछ ।