सिन्धुवा । पाख्रीबास नगरपालिका, छथर जोरपाटी गाउँपालिका र धनकुटा नगरपालिका धनकुटामा जारी दोस्रो पालिकास्तरीय अध्यक्ष कप नकआउट फुटबल प्रतियोगिताको सेमिफाइनलमा प्रवेश गरेको छ ।

शुक्रबार सम्पन्न दोस्रो क्वाटरफाइनलमा पाख्रीबासले महालक्ष्मी नगरपालिकालाई टाईब्रेकरमा ५–४ ले हराउँदै अन्तिम चारमा प्रवेश गरेको हो । त्यसअघि निर्धारित समयको खेल दुवै टोलीले २–२ गोलको बराबरी खेलेका थिए ।

निर्धारित समयतर्फ पाख्रीबासका लागि अर्पन तामाङ र उज्ज्वल भण्डारीले गोल गरेका थिए भने महालक्ष्मीका लागि बिबश गुरुङ र बिनोद क्षेत्रीले गोल गरेका थिए । यद्यपि टाईब्रेकरमा भने पाख्रीबास सफल बन्यो । खेलमा पाख्रीबासका अर्पन तामाङ प्लेयर अफ द म्याच बने ।

त्यस्तै तेस्रो क्वाटरफाइनलमा छथर जोरपाटीले साँगुरीगढी गाउँपालिकालाई ३–१ ले हराउँदै अन्तिम चारमा स्थान बनायो । छथर जोरपाटीका लागि बिक्रम लिम्बुले दुई गोल गर्दा थप एक गोल पर्वत दाहालले गरे । उता पराजित साँगुरीगढीका लागि भने संगम राईले गोल गरेका थिए । खेलमा छथर जोरपाटीका बिक्रम लिम्बु प्लेयर अफ द म्याच बने ।

त्यस्तै चौथो क्वाटरफाइनलमा धनकुटा नगरपालिकाले चौबिसे गाउँपालिकालाई २–० ले हराउँदै सेमिफाइनलमा स्थान बनायो । धनकुटाको जितमा दिपु शाक्य र संजय रमतेलले गोल गरे । खेलमा धनकुटा कै पदम भट्टराई प्लेयर अफ द म्याच बने ।