काठमाडौं । तेस्रो नेपाल सुपर लिगतर्फ यसपटक पनि आफ्नो बलियो दावेदारिता पेश गर्ने क्रममा धनगढी फुटबल क्लबले उत्कृष्ट जित हात पारेको छ ।

लिगको आफ्नो पहिलो खेलमा धनगढीले बुटवल लुम्बिनी फुटबल क्लबमाथि ४–१ को प्रभावशाली जित निकाल्यो । धनगढीका लागि अहमद हिजाजीले दुई गोल गरे । खेलको पाँचौं मिनट मै हिजाजीले धनगढीका लागि पहिलो गोल गरेका थिए ।

तर, ३०औं मिनटमा केन्टा हाराले बुटवलका लागि बराबरी गोल फर्काएका थिए । पहिलो हाफसम्म दुवै टोलीले १–१ को बराबरी नै खेले । दोस्रो हाफमा भने धनगढीले अन्तिमतिर तीन गोल थप्यो । ७४औं मिनटमा कृतिष रत्न छुन्जुले धनगढीका लागि दोस्रो गोल गरे । त्यस्तै इन्जुरी समयमा हिजाजी र सर्जेबर्बोजा जुनियरले लगातार दुई गोल थप्दै धनगढीको उत्कृष्ट जित पक्का गरे ।

यो जितसँगै एक खेलबाट ३ अंक जोडेको धनगढीले गोलभिन्नतामा चितवनलाई पछि पार्दै शिर्ष स्थानमा उक्लिएको छ । उता पराजित बुटवल भने दुई खेलबाट १ अंकका साथ छैठौं स्थानमा छ ।