काठमाडौं । दोस्रो नेपाल सुपर लिग (एनएसएल) तर्फ अपेक्षाकृत प्रदर्शन र शुरुवात गर्न नसकेको नवप्रवेशी टोली झापा फुटबल क्लबले मंगलबार सिजनको पहिलो जित हात पारेको छ ।

दशरथ रंगशालामा भएको एक मात्र खेलमा झापाले बुटवल लुम्बिनी फुटबल क्लबलाई शून्यका विरुद्ध एक गोलले हराउँदै महत्वपूर्ण जित र तीन अंक जोड्न सफल भएको हो ।

पहिलो हाफको ३८औं मिनटमा जर्जे सान्चेजले गरेको एक मात्र गोल झापाली टोलीलाई जित दिलाउन निर्णायक बन्यो । निर्णायक गोलकर्ता सान्चेज खेलको म्यान अफ द म्याच समेत चुनिए । उनले त्यसवापत नगद ३० हजार र ट्रफी हात पारे ।

यो जितपछि ५ खेलबाट ६ अंक जोडेको झापा छैठौं स्थानमा उक्लेको छ । र, शिर्ष चारको आफ्नो सम्भावनालाई पनि कायम राखेको छ । उता पराजित बुटवल भने ७ अंकका साथ पाँचौं स्थानमा छ । शिर्ष स्थानमा भने ९ अंक जोडेको ललितपुर सिटी रहेको छ ।