सुखड । सहारा युथ क्लब र बाघमारा स्पोर्टस क्लब यहाँ जारी वडा अध्यक्ष कप यु–२० नकआउट फुटबल प्रतियोगिताको क्वाटरफाइनलमा प्रवेश गरेका छन् ।

घोडाघोडी खेलमैदानमा भएको दिनको पहिलो खेलमा सहाराले गौरीगंगा–११ लाई टाईब्रेकरमा ४–३ ले हरायो । त्यसअघि निर्धारित समयको खेल दुवै टोलीले १–१ को बराबरी खेलेका थिए । खेलमा सहाराका बिबेक कडायत म्यान अफ दि म्याच बने ।

दिनको दोस्रो खेलमा बाघमाराले घोडाघोडी फुटबल एकेडेमीलाई टाईब्रेकर मै ५–४ ले हरायो । त्यसअघि निर्धारित समयको खेल दुवै टोलीले गोलरहित बराबरी खेलेका थिए । खेलमा बाघमाराका सरोज राना म्यान अफ दि म्याच चुनिए ।

घोडाघोडी क्लब, सुखड, कैलालीको आयोजनामा जारी प्रतियोगिताको विजेताले उपाधिसहित नगद ५० हजार हात पार्नेछ भने उपविजेताले ३५ हजार प्राप्त गर्नेछ । फाइनल खेल यही चैत्र २३ गतेका दिन हुनेछ ।