ताप्लेजुङको मैवाखोला गाउँपालिका ३ सॉघुमा जारी महाशिवरात्रि मेला अन्तर्गत आयोजित पालिका स्तरीय महिला फुटबल प्रतियोगिताको सेमिफाइनल समिकरण पूरा भएको छ ।

सात टिम सहभागि रहेको प्रतियोगितामा बिहीबार सम्पन्न पहिलो क्वाटरफाइनलमा फुङलिङ नगरपालिका ताप्लेजुङले १-० मैवाखोला गाउँपालिकालाई पराजित गर्दै सेमिफाइनल प्रवेश गरेको हो ।

त्यस्तै दोस्रो क्वाटरफाइनलमा म्याङलुङ नगरपालिका तेह्रथुमले आठराई त्रिवेणि गाउँपालिका ताप्लेजुङलाई १-० को झिनो अन्तरले पराजित गर्दै सेमिफाइनल यात्रा तय गरेको हो । साथै सेमिफाइनलमा मेरिङदेन गाउँपालिकासंगको प्रतिस्पर्धा निश्चित गरेको छ ।

त्यसैगरी अन्तिम क्वाटरफाइनलमा फक्ताङलुङ गाउँपालिकालाई ५-१ गोल अन्तरले पराजित गर्दै मेन्छ्यायेम गाउँपालिका तेह्रथुमले सेमिफाइनलमा फुङलिङ नगरपालिका संगको भेट पक्का गरेको छ ।

प्रतियोगिताको विजेताले ८० हजार सहित ट्रफि र उपविजेताले ४० हजार सहित ट्रफि प्राप्त गरेछन । जलजले क्लब सॉघु ताप्लेजुङले फागुन १३ गते देखि आयोजना गरेको महाशिवरात्रि मेला फागुन १७ गते सकिनेछ ।