काठमाडौं । यहाँ जारी प्रधानसेनापति ट्रफी फुटबल प्रतियोगिताको फाइनलमा श्री भैरवनाथ गण र श्री काली शक्ति ई गण उपाधिका लागि भिड्ने भएका छन् ।

राजदल खेलमैदानमा सम्पन्न पहिलो सेमीफाइनलमा श्री भैरवनाथ गणले श्री चन्दननाथ गणलाई ३–२ गोल अन्तरले पराजित गर्दै फाइनलमा स्थान बनाएको छ । त्यस्तै दोस्रो सेमीफाइनलमा श्री काली शक्ति ई गणले श्री गोरख बहादुर गणलाई सडन डेथ ५–४ ले पराजित गर्दै फाइनलको लागि आफ्नो स्थान पक्का गर्यो ।

प्रतियोगिता अन्तर्गत फाइनल खेल मंगलबार दिउँसो १ बजे आर्मी हेडक्वार्टरको खेलमैदानमा हुने आयोजकले जानकारी दियो । त्यस्तै तेस्रो स्थानको लागि भने श्री चन्दननाथ गण र श्री गोरख बहादुर गण बीचको खेल राजदल खेल मैदानमा हुनेछ ।