काठमाडौं । एन्फा राष्ट्रिय लिग फुटबल प्रतियोगिता अन्तर्गत आइतबार भएका तीन खेलहरुमा संकटा फुटबल क्लब, एपिएफ फुटबल क्लब र जावलाखेल युथ क्लबले आ–आफ्नो खेलहरुमा जित हात पारेका छन् ।

च्यासल स्टेडियममा भएको दिनको पहिलो खेलमा संकटाले कांक्रेबिहार क्लबलाई ४–० को अन्तरले हरायो । संकटाको जितमा अनिष महर्जन, कृष्ण बहादुर आले, बिशाल तामाङ र गिलबर्ट बिल्गोले गोल गरे ।

त्यस्तै च्यासल स्टेडियम मै भएको अर्को खेलमा एपिएफले फ्रेण्डस क्लबलाई १–० को साँघुरो अन्तरले हरायो । फ्रेण्डसका खेमराज श्रेष्ठले गरेको आत्मघाती गोल नै एपिएफलाई जित दिलाउन निर्णायक गोल बन्यो ।

त्यसैगरी एन्फा कम्प्लेक्समा भएको अर्को खेलमा जावलाखेलले श्री भगवती क्लबमाथि ४–० को उत्कृष्ट जित दर्ता गर्यो । जावलाखेलको जितमा हेमिल्टन र धर्मेन्द्रले समान दुई–दुई गोलको योगदान दिंदै टोलीलाई महत्वपूर्ण तीन अंक दिलाए ।