काठमाडौ । चाइनिज नयाँ वर्षको अवसर पारी नेपालमै हुन गईरहेको नेपाली युथ टिम र चीनको युनान युथ क्लब बीचको मैत्रीपूर्ण खेल आउँदो फागुन ३ गते हुने पक्का भएको छ ।

यसअघि नेपाली र चाइनिज टोलीबिच मैत्रीपूर्ण खेल हुने पक्क भए तापनी अन्य जानकारीबारे विस्तृत रुपमा खुलाईएको थिएन । यद्यपि आइतबार एन्फाले आधिकारिक रुपमा उक्त मैत्रीपूर्ण खेलबारे जानकारी गराएको हो ।

एन्फाका अनुसार मैत्रीपूर्ण खेल दशरथ रंगशालामा हुनेछ । खेलको प्राविधिक व्यवस्थापन एन्फाले गर्नेछ भने अन्य आवश्यक व्यवस्थापन चिनियाँ राजदुतावासले गर्नेछ ।

स्मरण रहोस, राजेश शाहीको मुख्य प्रशिक्षकीय जिम्मेवारीमा रहेको नेपालको प्रारम्भिक ४५ सदस्यीय टोली युनान युथसँग खेल्न कै लागि हाल बन्द प्रशिक्षणमा व्यस्त छ । मुख्य प्रशिक्षक शाहीले छिटै नेपाली टोलीको फाइनल स्क्वाड घोषणा गर्ने पनि जानकारी गराएका छन् ।