काठमाडौं । कोहलपुर रेसिङ्ग सहारा क्लब, बाँकेको आयोजनामा हुने दोस्रो कोहलपुर गोल्डकप नकआउट फुटबल प्रतियोगितालाई अखिल नेपाल फुटबल संघ (एन्फा) ले स्वीकृतिसँगै आयोजना मिति तोकेको छ ।

एन्फाले दोस्रो कोहलपुर गोल्डकप आयोजनाका लागि आयोजकलाई असोज २६ गतेदेखि मिति उपलब्धतासँगै स्वीकृति दिएको हो । साथै एन्फाले प्रतियोगिता सञ्चालनका लागि प्राविधिक जनशक्ति एन्फाबाट मनोनयन गराई सञ्चालन गर्न समेत पत्रमा उल्लेख गरेको छ ।

त्यस्तै प्रतियोगिता नियमावली र खेलतालिका १५ दिन अघि एन्फामा पेश गर्नुपर्ने बताइएको छ । साथै प्रतियोगिता सम्पन्न भएको सात दिनभित्र प्रतिवेदन बुझाउन पनि एन्फाले आयोजकलाई निर्देशन दिएको छ ।