काठमाडौँ । प्रयागराज सिंह सुवाल स्मृति अन्तर वडा फुटसल प्रतियोगितामा आयोजक वडा नं २३ ले विजयी सुरुआत गरेको छ । काठमाडौँ महानगरपालिकाका वडाहरु बीच लैनचौर फुटसल मैदानमा शुरु प्रतियोगिताको उद्घाटन खेलमा वडा नं २३ ले काठमाडौँ महानगरपालिकालाई ५–३ गोलले पराजित गर्यो ।

विशाल श्रेष्ठको ह्याट्रिकले वडा २३ को जित सम्भव भएको हो । विजयी टिमका लागि सिरिस महर्जन र सुमिन मानन्धरले पनि गोल गरे । काठमाडौँ महानगरपालिकाका विनय शाक्य र गौरवले गोल गरे ।

पहिलो दिन भएको अन्य खेलमा वडा नं १४ ले वडा नं ३० लाई ३–१ र वडा नं २२ ले वडा नं १६ लाई ३–० ले हराए । वडा नं २२ का लागि सुशील खड्गीले ह्याट्रिक गरे । पहिलो दिन विजयी तीनै टिम प्रिक्वाटरफाइनलमा पुगेका छन् ।

बुधबार वडा नं ५ ले वडा २६, वडा २८ ले वडा २४, वडा २१ ले वडा १३ र वडा १२ ले वडा १८ सँग खेल्नेछन् । यसअघि काठमाडौँ महानगरपालिका प्रमुख बालेन्द्र शाहले प्रतियोगिताको उद्घाटन गरेका थिए ।

असोज ३ गतेसम्म हुने प्रतियोगितामा काठमाडौँ महानगरपालिका केन्द्रसहित ३० वडाको सहभागिता रहेको छ । नकआउटको आधारमा हुने  प्रतियोगिताको विजेताले उपाधिसहित नगद २ लाख हात पार्नेछ भने उपविजेताले १ लाखसहित ट्रफी, मेडल र प्रमाणपत्र प्राप्त गर्नेछ ।