दियोबजार । सोमबारदेखि रुपन्देहीको कञ्चन गाउँपालिकामा शुरु १६औं कञ्चन कप खुला नकआउट फुटबल प्रतियोगितामा सैनामैना कलेज, सैनामैनाले रोमाञ्चक जित हात पार्दै विजयी शुरुवात गरेको छ ।

कञ्चन गाउँपालिका ४ दियो बजार स्थित हिमालय खेलमैदानमा भएको उद्घाटन खेलमा सैनामैनाले राजेश स्मृति फाउण्डेशन, कपिलवस्तुलाई ३–२ ले हरायो ।

सैनामैनाको जितमा अविनाश गुरुङ, शम्भु घर्ती र सुजलमान घलेले गारे । पराजित राजेश स्मृति फाउण्डेशनका लागि भने दुवै गोल कुनाल सारुले गरे । खेलमा सैनामैनाका सुजलमान घले म्यान अफ दि म्याच समेतघोषित भए ।

यो जितसँगै सैनामैना क्वाटरफाइनलमा समेत प्रवेश गरेको छ । प्रतियोगिता अन्तर्गत फागुन ६ गते मंगलबारको खेल आयोजक हिमालय सामुदायिक विकास केन्द्र, कञ्चन–४, दियोबजार र इभोलुशन क्लब अफ बुटवल, तामनगरबीच हुने आयोजकले जानकारी दियो ।

त्यसअघि प्रतियोगिताको उद्घाटन खेल कञ्चन गाउँपालिका ४ का वार्ड अध्यक्ष केशर बहादुर खत्री, आयोजक संस्थाका अध्यक्ष प्रकाश थापा लगायतले संयुक्त रुपमा गरेका थिए ।

हिमालय सामुदायिक विकास केन्द्र, कञ्चन–४, दियोबजारको आयोजनामा शुरु प्रतियोगिताको विजेताले उपाधिसहित नगद २ लाख १ हजार हात पार्नेछ भने उपविजेताले १ लाख १ हजार प्राप्त गर्नेछ । फाइनल खेल यही फागुन १४ गतेका दिन हुनेछ ।