कोहिटवा । उत्कृष्ट जित हात पार्दै समपुर्ण युवा क्लब, सुपौली जारी स्व. कमलराज पाठक स्मृति २२औं लिस्नु कप खुला नकआउट फुटबल प्रतियोगिताको फाइनलमा प्रवेश गरेको छ ।

सोमबार भएको पहिलो सेमिफाइनलमा एक खेल खेलाडी कम हुनुका बावजुद समपुर्णले वालिङ युनाइटेड फुटबल क्लब, स्याङ्जालाई ३–१ ले हराउँदै फाइनलमा स्थान पक्का गरेको हो ।

पशुपति माविको खेलमैदानमा भएको पहिलो सेमिफाइनलमा समपुर्णका लागि गणेश हमालले दुई गोल गरे भने थप एक गोल सुमित श्रेष्ठले गरे । पराजित वालिङका लागि सञ्जय रानाले उक मात्र गोल फर्काएका थिए ।

खेलमा समपुर्णका लागि दुई गोल गरेका गणेश हमाल म्यान अफ द म्याच घोषित भए । प्रतियोगिता अन्तर्गत असोज १ गते मंगलबारको दोस्रो सेमिफाइनल खेल झरना स्पोर्टस क्लब, कुञ्जलापुर र फर्साटिकर युवा क्लब, फर्साटिकर बीच हुने खेल संयोजक कृष्ण गुरुङले जानकारी दिए ।

लिस्नु युवा क्लब, तिलोत्तमा–१५, कोटिहवाको आयोजनामा जारी प्रतियोगिताको विजेताले उपाधिसहित नगद ३ लाख २५ हजार हात पार्नेछ भने उपविजेताले १ लाख ६५ हजार प्राप्त गर्नेछ । कुल १२ टोलीहरु सहभागि प्रतियोगिताको फाइनल खेल असोज ३ गतेका दिन हुनेछ ।