काठमाडौं । उत्कृष्ट जित निकाल्दै मनाङ मस्र्याङ्दी क्लब जारी एन्फा युथ लिगको शिर्ष स्थानमा उक्लिएको छ । सोमबार भएको खेलमा मनाङले एफसी खुमलटारमाथि ३–१ को जित निकाल्यो ।

यो जितपछि ५ खेलबाट १२ अंक जोडेको मनाङ शिर्ष स्थानमा उक्लिएको छ । पराजित खुमलटारको खातामा ३ अंक छ र लिगतालिकाको पुछारतिर संघर्षरत छ ।

सोमबार नै भएको अर्को खेलमा त्रिभुवन आर्मी फुटबल क्लबले पहिलो जित हात पार्यो । आर्मीले थ्रीस्टार क्लबमाथि समान ३–१ को प्रभावशाली जित निकाल्दै महत्वपूर्ण तीन अंक जोड्यो ।

यो नतिजापछि ५ खेलबाट ४ अंक जोडेको आर्मी शिर्ष दशभित्र उक्लिएको छ । पराजित थ्रीस्तारको पनि समान ४ अंक छ ।

डबल राउण्ड रोबिन लिगका आधारमा हुने प्रतियोगितामा कुल १२ टोलीहरु सहभागि छन् । लिगको शिर्ष स्थान हासिल गर्ने टोली विजेता बन्नेछ । विजेताले उपाधिसहित नगद १ लाख हात पार्नेछ भने दोस्रो स्थान हासिल गर्ने टोलीले ५० हजार प्राप्त गर्नेछ ।