धनकुटा । शहिद भिमनारायण स्मृति प्रतिष्ठान, धनकुटाको आयोजनामा आइतबारदेखि शुरु भएको १६औं शहिद भिमनारायण गोल्डकपको उद्घाटन खेल प्रतिकुल मौसमका कारण बिथोलिएको छ ।

एपिएफ, काठमाडौं र फोर स्टार युथ क्लब, मोरङ बीचको उद्घाटन खेल चलिरहेकै बेला लगातारको भारी बर्षाले गर्दा खेल रोकिन पुगेको हो । खेलमा एपिएफले सुमन श्रेष्ठको गोलबाट १–० को अग्रता कायम राखेको बेला खेल रोकिन पुगेको थियो ।

आयोजकका अनुसार आज रोकिएको खेल बैशाख २४ गते सोमबार रोकिए कै समयबाट पूनः सुचारु गरिने आयोजकले जनाएको छ । त्यस्तै सोमबार नै हुने दोस्रो क्वाटरफाइनलमा त्रिभुवन आर्मी फुटबल क्लब, काठमाडौं र बिर्तामोड युनाइटेड, झापा पनि भिड्ने कार्यक्रम छ ।

यही बैशाख २९ गतेसम्म चल्ने प्रतियोगिताको विजेताले उपाधिसहित नगद ५ लाख हात पार्नेछ भने उपविजेताले २ लाख ५० हजार प्राप्त गर्नेछ ।