काठमाडौं । भारतलाई मंगलबार सम्पन्न १४औं बंगबन्धु साफ च्याम्पियनसिपको उपाधि किर्तिमानी नवौंपटक जिताउन महत्वपूर्ण भूमिका खेलेका कप्तान सुनिल क्षेत्री लगातार दोस्रोपटक सर्वाधिक गोलकर्ता र सर्वोत्कृष्ट खेलाडी चुनिएका छन् ।

प्रतियोगिताभरि कुल ५ गोलका क्षेत्रीले सर्वाधिक गोलकर्ता बने वापत गोल्डेन बुट अवार्ड हात पारे भने सर्वोत्कृष्ट खेलाडी बने वापत गोल्डेन बल पनि आफ्नो कब्जामा पार्न सफल भए । स्मरण रहोस, माल्दिभ्समा सम्पन्न गत संस्करणको साफ च्याम्पियनसिपमा पनि क्षेत्रीले सर्वाधिक गोलकर्ता र सर्वोत्कृष्ट खेलाडीको पुरस्कार जितेका थिए ।

मंगलबार भएको फाइनलमा भारतले कुवेतलाई सडन डेथमा हराउँदै उपाधि जित्न सफल भएको थियो । त्यसअघि निर्धारित समयको प्रतिस्पर्धात्मक खेल दुवै टोलीले १–१ गोलको बराबरी खेलेका थिए । भारत प्रतियोगिताको डिफेन्डिङ च्याम्पियन पनि हो ।