काठमाडौं । साफ च्याम्पियनसिपमा आज राती नेपालले श्रीलंकाको सामना गर्दा टोलीको उद्देश्य लगातार दोस्रो जित हात पार्नु हुनेछ । आफ्नो पहिलो खेलमा घरेलु टोली तथा साविक विजेता माल्दिभ्सलाई १–० ले हराएर उत्साहित बनेको नेपाल सोही जितको लयलाई आज श्रीलंका विरुद्ध पनि कायम राख्न चाहन्छ ।

माले सिटी स्थित नेशनल फुटबल स्टेडियममा हुने आजको खेल श्रीलंकाका लागि पनि उत्तिकै महत्वपुर्ण छ । उद्घाटन खेलमा बंगलादेशससँग १–० ले पराजित हुन पुगेको श्रीलंकन टोली पहिलो जितको खोजीमा छ ।

पछिल्लो समयमा आफ्नो खेलमा सुधार ल्याईरहेको श्रीलंकालाई नेपालले हलुका रुपमा नलिने नेपालका कप्तान र प्रशिक्षकले खेल अघिको पत्रकार सम्मेलनमा स्पष्ट पारिसकेका छन् ।

आजको खेल नेपाली समयअनुसार राती ९ः४५ बजेदेखि शुरु हुँदैछ । त्यसअघि आज उपाधिको दावेदार मानिएको भारतले बंगलादेशसँग खेल्दैछ । जुन खेल नेपाली समयअनुसार बेलुकाको ४ः४५ बजेदेखि शुरु हुँदैछ ।