काठमाडौं । ललितपुर सिटी फुटबल क्लबले जारी खुकुरी नेपाल सुपर लिग (एनएसएल) मा आइतबार आफ्नो तेस्रो बराबरी खेलेको छ ।

आइतबार दशरथ रंगशालामा भएको खेलमा ललितपुरले पोखरा थन्डर्ससँग गोलरहित बराबरी खेल्दै अंक बाँडेको हो । खेलमा लतिलपुरका प्रवेश कुँवर प्लेयर अफ द म्याच घोषित भए ।

यो बराबरीसँगै ४ खेलबाट ३ अंक मात्र जोडेको ललितपुर लिगतालिकाको छैटौं स्थानमा छ । पुछारमा छ भने २ अंकका साथ एफसी चितवन रहेको छ । उता ललितपुरसँग बराबरी खेलेको पोखरा थन्डर्स भने ५ अंक जोड्दै लिगतालिकाको तेस्रो स्थानमा उक्लिएको छ ।

प्रतियोगिता अन्तरगत बैशाख २० गते सोमबारको एक मात्र खेल एफसी चितवन र बिराटनगर सिटी फुटबल क्लबबीच हुने आयोजकले सार्वजनिक गरेको खेलतालिकामा उल्लेख छ ।