इलाम । संघर्षपुर्ण जितका साथ मच्छिन्द्र फुटबल क्लब, काठमाडौं इलाममा जारी एनआरएनए तेस्रो इलाम गोल्डकप अन्तर्राष्ट्रिय आमन्त्रण नकआउट फुटबल प्रतियोगिताको सेमिफाइनलमा प्रवेश गरेको छ ।

सोमबार भएको तेस्रो क्वाटरफाइनलमा मच्छिन्द्रले पाहुना टोली एन पेनाङ फुटबल क्लब, मलेसियालाई पेनाल्टी शुटआउटमा हराउँदै अन्तिम चारको यात्रा तय गर्यो । निर्धारित समयको खेल गोलरहित बराबरीमा टुंगिएपछि पेनाल्टी शुटआउटमा मच्छिन्द्र ३–२ ले विजयी बन्यो । खेलमा मच्छिन्द्रका गोलरक्षक प्रदिप भण्डारी प्लेयर अफ द म्याच बने ।

प्रतियोगिता अन्तर्गत बैशाख ८ गते मंगलबारको चौथो क्वाटरफाइनल खेल न्युरोडटिम (एनआरटी), काठमाडौं र चित्लाङ फुटबल क्लब, काठमाडौंबीच हुने आयोजकले जानकारी दियो ।

रेड हर्ष फुटबल क्लब, इलामको आयोजनामा जारी प्रतियोगिताको विजेताले उपाधिसहित नगद १० लाख हात पार्नेछ भने उपविजेताले ५ लाख प्राप्त गर्नेछ । फाइनल खेल बैशाख १२ गतेका दिन हुनेछ ।