काठमाडौं । एन्फा राष्ट्रिय लिग फुटबल प्रतियोगिता अन्तर्गत मंगलबार भएका दुई खेलहरुमा मनाङ मस्र्याङ्दी क्लब र मच्छिन्द्र फुटबल क्लबले जित हात पार्दै आ–आफ्नो खातामा महत्वपूर्ण तीन–तीन अंक जोडेका छन् ।

सातदोबाटो स्थित एन्फा कम्प्लेक्सको मैदानमा भएको दिनको पहिलो खेलमा मनाङले चित्लाङ फुटबल क्लबलाई २–० ले पराजित गर्दै आफ्नो खातामा तीन अंक जोडेको हो । मनाङको जितमा शेरभ तामाङ र सुमित मल्लले गोल गरे ।

यो जितपछि लिगमा १० खेल खेलेको मनाङको खातामा १२ अंक छ । उता पराजित चित्लाङको खातामा भने ७ अंक रहेको छ ।

त्यस्तै मंगलबार नै सम्पन्न भएको दोस्रो खेलमा मच्छिन्द्रले जन जागृति युवा क्लबलाई ४–० को उत्कृष्ट अन्तरले हराउँदै खातामा तीन अंक जोड्यो । मच्छिन्द्रका लागि जोनाथनले ह्याट्रिक गर्दा अर्को एक गोल रेजिन सुब्बाले गरे ।

यो जितपछि ९ खेलबाट २१ अंक जोडेको मच्छिन्द्र शिर्ष स्थानमा छ । पराजित नव जनजागृति भने अझै अंकविहीनका रुपमा संघर्षरत छ ।