काठमाडौं । राष्ट्रिय लिग फुटबल प्रतियोगिता अन्तर्गत मंगलबार भएका दुई खेलहरु मध्ये एक खेल बराबरीमा सकिएको छ भने अर्को खेलमा रोमाञ्चक जितको नतिजा निस्किएको छ ।

एन्फा कम्प्लेक्समा भएको दिनको पहिलो खेलमा विभागीय टोली त्रिभुवन आर्मी फुटबल क्लबले लालीगुराँस एसोसिएशनसँग गोलरहित बराबरी खेलेको छ । यो नतिजापछि अपराजित लालीगुराँसको खातामा चार खेलबाट १० अंक छ । उता आर्मीसँग भने पाँच अंक रहेको छ ।

त्यस्तै मंगलबार नै भएको अर्को खेलमा प्लानिङ ब्वाईज युनाइटेडले सातदोबाटो युथ क्लबलाई ४–२ ले हरायो । प्लानिङ ब्वाईजका लागि फागुराम थारुले दुई गोल गर्दा रोमन भुजेल र एलेक्स विलानेको नाममा एक–एक गोल रह्यो । उता सातदोबाटोका लागि भने बोबिरशोह सोबिरोव र फोडे फोफनाले गोल गरेका थिए ।