काठमाडौं । बुधबारदेखि शुरु भएको बहुप्रतिक्षित राष्ट्रिय लिग फुटबल प्रतियोगिता अन्तर्गत पहिलो दिन फ्रेण्डस क्लबले उत्कृष्ट जित हात पार्दा चर्च ब्वाईज युनाइटेड भने हारबाट जोगिएको छ ।

एन्फा कम्प्लेक्समा भएको पहिलो खेलमा फ्रेण्डसले काक्रेंबिहार क्लबलाई ३–१ ले हरायो । खेलको छैठौं मिनटमा खेमराज श्रेष्ठको आत्मघाती गोलबाट अग्रता भने कांक्रेबिहारले नै लिएको थियो । तर पहिलो हाफ कै इन्जुरी समयमा प्रशान्त लक्षमले फ्रेण्डसका लागि पहिलो बराबरी गोल फर्काए ।

दोस्रो हाफको ५९औं मिनटमा प्रवेश बस्नेतले फ्रेण्डसका लागि दोस्रो गोल थपे भने अन्तिमतिर ९०औं मिनटमा आशिष चापागाईंले तेस्रो गोल गर्दै फ्रेण्डस क्लबको जित पक्का गरे ।

त्यस्तै बुधबार नै भएको दोस्रो खेलमा चर्च ब्वाईज युनाइटेडले श्री भगवती क्लबसँग १–१ गोलको बराबरी खेल्यो । खेलको ४५औं मिनटमा हरिहर बुढा मगरको गोलबाट श्री भगवतीले खेलमा अग्रता बनाएको थियो । तर ५६औं मिनटमा एरिक बिष्टले चर्च ब्वाईजका लागि बराबरी गोल फर्काएका थिए ।

करिब तीन महिना चल्ने लिगमा कुल १७ टोलीहरु सहभागि छन् । सिंगल राउण्ड रोबिनका आधारमा हुने प्रतियोगिताको विजेताले उपाधिसहित नगद ५० लाख हात पार्नेछ भने उपविजेताले २५ लाख प्राप्त गर्नेछ । त्यस्तै तेस्रो स्थान हासिल गर्ने टोलीले १५ लाख प्राप्त गर्नेछ ।