भवानीपुर । शनिबारदेखि शुरु भएको ४४औं जनचेतना रनिङ शिल्ड फुटबल प्रतियोगितामा अल्टोकी क्लब, रौतहटले विजयी शुरुवात गर्दै सेमिफाइनलमा प्रवेश गरेको छ ।

शनिबार भएको उद्घाटन खेल तथा पहिलो क्वाटरफाइनलमा अल्टोकीले गाईघाट फुटबल क्लब, उदयपुरलाई टाईब्रेकरमा ५–४ ले हराउँदै विजयी शुरुवातका साथ अन्तिम चारमा स्थान बनाएको हो ।

त्यसअघि निर्धारित समयको खेल दुवै टोलीले १–१ गोलको बराबरी खेलेका थिए । जनचेतना माविको खेलमैदानमा भएको निर्धारित समयको खेलतर्फ अल्टोकीका लागि भरत चौधरीले गोल गरेका थिए भने गाईघाटका लागि मन्दिप ढुंगेलले गरेका थिए ।

खेलमा अल्टोकीका बिनायक चौधरी म्यान अफ दि म्याच घोषित भए । प्रतियोगिता अन्तर्गत कार्तिक ९ गते आइतबारको दोस्रो सेमिफाइनल खेल बिवाइसी बर्दिवास र प्रोग्रेसिभ युवा क्लब, सप्तरी बीच हुने आयोजकले जानकारी दियो ।

महुली ११ स्पोर्टस क्लब, घोघिदाहा भवानीपुर, सप्तरीको आयोजनामा शुरु प्रतियोगिताको विजेताले उपाधिसहित नगद ५० हजार हात पार्नेछ भने उपविजेताले ३५ हजार प्राप्त गर्नेछ । फाइनल खेल यही कार्तिक १६ गतेका दिन हुनेछ ।