काठमाडौं । एसियाली फुटबलको सर्वोच्च निकाय एसियन फुटबल कन्फिडरेशन (एएफसी) ले अखिल नेपाल फुटबल संघ (एन्फा) लाई आर्थिक जरिवानासहित कारवाही गरेको छ ।

नेपालले एएफसी फुटसल एसियन कप छनौट प्रतियोगिताबाट अन्तिम समयमा आएर नाम फिर्ता लिएपछि एन्फालाई एएफसीले कारवाही गरेको हो । नेपालले यही सेप्टेम्बर २० तारीखदेखि शुरु हुन गईरहेको फुटसल एसियन कप छनौट प्रतियोगिताबाट नाम फिर्ता लिएपछि एएफसीले एन्फालाई १० हजार अमेरिकी डलर जरिवाना गरेको छ ।

साथै एएफसीले उक्त जरिवाना रकम ३० दिनभित्र बुझाउन एन्फालाई आदेश समेत दिएको छ । स्मरण रहोस, एन्फालाई एएफसीको गत अगस्त २१ तारीखका दिन बसेको अनुशासन कमिटीको बैठकले सो जरिवानाको निर्णय गरेको हो । तर, निकट स्रोतका अनुसार एन्फाले अझै उक्त जरिवाना रकम बुझाएको छैन ।

त्यसबाहेक एएफसीले नेपाललाई अर्को संस्करणको एएफसी फुटसल एसियन कप छनौट प्रतियोगितामा सहभागिता जनाउन नपाउने गरी कारवाही समेत गरेको छ ।