काठमाडौं । बंगलादेशको ढाकामा जारी साफ यु–२० महिला च्याम्पियनसिपतर्फ केही खेलहरु आयोजना हुने खेलस्थलमा परिवर्तन गरिएको दक्षिण एसियाली फुटबल महासंघ (साफ) ले जनाएको छ ।

साफले बुधबार आधिकारिक सूचना जारी गर्दै यही जुलाई १७ तारीख बिहीबार र जुलाई १९ तारीख शनिबारका दिन हुने खेलहरुको आयोजना स्थलमा परिवर्तन गरिएको जनाएको छ । जसअनुसार जुलाई १७ र १९ तारीखका दिन हुने चार खेलहरु अब बसुन्धरा स्पोर्टस ग्राउण्डमा हुनेछन् ।

स्मरण रहोस, यसअघि लिग चरणका शुरुवाती तीन खेलहरु बसुन्धरा किंग्स एरिनामा भएका थिए । यद्यपि तेस्रो चरणको खेलका क्रममा बर्षाले मैदानको अवस्था बिग्रिएपछि ती खेलहरु अर्को मैदानमा खेलाइएको थियो ।

तेस्रो चरणतर्फ बंगलादेश र भुटानबीचको खेल मध्यान्तरपछि स्टेडियम नजिकैको अभ्यास मैदान बसुन्धरा स्पोर्टस ग्राउण्डमा खेलाइएको थियो । त्यस्तै सोही दिन भएको नेपाल र श्रीलंकाबीचको खेल पनि सोही मैदानमा खेलाइएको थियो ।

प्रतियोगिता अन्तर्गत १७ जुलाई बिहीबारका दिन हुने चौथो चरणको खेलतर्फ नेपालले फेरि श्रीलंकासँग खेल्दैछ भने सोही दिन बंगलादेशले भुटानको सामना गर्दैछ । डबल राउण्ड रोबिनका आधारमा जारी प्रतियोगिताको शिर्ष टोली विजेता बन्नेछ ।

साफले निकालेको सूचना पनि हेर्नुहोसः