काठमाडौं । अमेरिकामा रहेका प्रवासी नेपालीहरुद्वारा स्थापित डालास गुर्खाज (डिजी) फाउन्डेशनको आयोजनामा आउँदो सेप्टेम्बर २० र २१ तारीखका दिन अमेरिकामा रहेका नेपाली समुदायहरुबीच १४औं गुर्खाज कप सेभेन ए साईड फुटबल प्रतियोगिता हुने भएको छ ।

प्रतियोगिता खुला, भेट्रान (३५ वर्षमाथि) र युथ गरी तीन फरक उमेर समूहमा हुने आयोजकले जनाएको छ । प्रतियोगितामा सहभागिता जनाउन चाहने इच्छुक क्लबहरुका लागि सेप्टेम्बर १३ तारीखसम्म टिमदर्ता खुला गरिएको छ । जसअन्तर्गत खुलातर्फ १००० डलर, भेट्रातफ ८५० डलर र युथतर्फ २५० डलर टिमदर्ता शुल्क तोकिएको छ ।

प्रतियोगिताको खुलातर्फको विजेताले उपाधिसहित नगद १० हजार डलर हात पार्नेछ भने उपविजेताले ४५०० डलर प्राप्त गर्नेछ । त्यस्तै भेट्रानतर्फको विजेताले उपाधिसहित नगद ६००० डलर हात पार्नेछ भने उपविजेताले २५०० डलर प्राप्त गर्नेछ । त्यस्तै युथ विधातर्फको पुरस्कार राशी भने केही समयपछि सार्वजनिक गरिने आयोजकले जनाएको छ ।