बागधुरा । लिस्नु युवा क्लब, कोटिहवा जारी स्व. लाल बहादुर तथा डम्मरकुमारी छन्तेल स्मृति सातौं सञ्जिवनी कप खुला नकआउट फुटबल प्रतियोगिताको सेमिफाइनलमा प्रवेश गर्ने अन्तिम टोली बनेको छ ।

बुधबार भएको चौथो क्वाटरफाइनलमा लिस्नुले नवयुवा खेलकुद तथा साँस्कृतिक परिवार, ठुटिपिपललाई ८–० को फराकिलो अन्तरले हराउँदै सेमिफाइनलमा स्थान पक्का गरेको हो ।

लिस्नुको जितमा मनिष चौधरीले ह्याट्रिकसहित चार गोल गरे । अन्य गोल भने एमोस पुन, विश्व थापा मगर, अनुज थापा र आयुष गुरुङ्गले गरे । खेलमा चार गोल गरेका लिस्नुका मनिष चौधरी म्यान अफ दि म्याच घोषित भए । लिस्नुले अब माघ २५ गते हुने दोस्रो सेमिफाइनलमा न्यु सृजना युवा क्लब, करौजियासँग खेल्नेछ ।

प्रतियोगिता अन्तर्गत माघ २४ गते बिहीबारको पहिलो सेमिफाइनल खेल साविक विजेता फर्साटिकर युवा क्लब, फर्साटिकर र झरना स्पोर्टस क्लब, कुञ्जलापुरबीच हुने खेल संयोजक खिम थापाले जानकारी दिए ।

सञ्जिवनी युवा क्लब, तिलोत्तमा–१४, बागधुरा, देवीनगरको आयोजनामा जारी प्रतियोगिताको विजेताले उपाधिसहित नगद १,२२,२२२ रुपैयाँ हात पार्नेछ भने उपविजेताले ६१,१११ रुपैयाँ सहित ट्रफी, मेडल र प्रमाणपत्र प्राप्त गर्नेछ । फाइनल खेल माघ २७ गतेका दिन हुनेछ ।