काठमाडौं । दि इयुसेबोन क्यापिटल मार्केट फुटसल च्याम्पियनसिपको पुरुषतर्फ शेयर प्रो सेक्युरिटिज र महिलातर्फ एनएमबी क्यापिटलले उपाधि जितेको छ ।

ढुकु फुटसल हबमा सम्पन्न पुरुषतर्फको फाइनलमा शेयर प्रोले एसियन सेक्युरिटीजलाई २–१ ले हराउँदै पुरुषतर्फको फुटसल च्याम्पियन बन्यो ।

त्यस्तै महिलातर्फ एनएमबी क्यापिटलले सेबोनलाई पेनाल्टी शुटआउटमा हराउँदै उपाधिमाथि कब्जा जमायो । त्यसअघि निर्धारित समयको प्रतिस्पर्धात्मक खेल दुवै टोलीले गोलरहित बराबरी खेलेका थिए ।

विधागततर्फ पुरुषतर्फको शेयर प्रो का अर्घ रेग्मी प्रतियोगिताको सर्वोत्कृष्ट खेलाडी घोषित भए । नेपाल एसबीआई मर्चेन्टका पुजन खड्काले सर्वाधिक गोलकर्ताको पुरस्कार जित्दा एसियन सेक्युरिटीजका प्रबिन पोखरेल उत्कृष्ट गोलरक्षक चुनिए ।

त्यसैगरी महिलातर्फ सेबोनकी निशा थापा प्रतियोगिता कै सर्वोत्कृष्ट खेलाडी घोषित भईन् । सर्वाधिक गोलकर्ताको पुरस्कार पनि सेबोन कै निशा थापाले हात पारिन् भने उत्कृष्ट गोलरक्षक एनएमबी क्यापिटलकी निशा देवकोटा चुनिईन् ।

३१ पुरुष तथा ९ महिला खेलाडी गरी कुल ४० टिमको सहभागिता रहेको प्रतियोगिताको विजेता तथा उपविजेता खेलाडीहरुलाई समापन कार्यक्रमका अतिथी राष्ट्रिय फुटबल खेलाडी बिकेश कुथु लगायतले पुरस्कृत गरेका थिए ।