काठमाडौं । गत साता घरमै सम्पन्न साफ यु–२० च्याम्पियनसिपको उपविजेता बनेको नेपाली यु–२० फुटबल टोलीका सदस्यहरुलाई अखिल नेपाल फुटबल संघ (एन्फा) ले नगदसहित पुरस्कृत गर्ने भएको छ ।

एन्फाको हालै बसेको कार्यसमितिको बैठकले साफ यु–२० च्याम्पियनसिपको फाइनल खेलेका युवा खेलाडीहरुलाई जनही ५०–५० हजारका दरले पुरस्कृत गर्ने भएको हो । त्यस्तै एन्फाले प्रतियोगिताको टिकट बिक्रीबाट उठेको २० प्रतिशत रकम पनि खेलाडीहरुलाई दिने घोषणा गरेको छ ।

यो निर्णयसँगै खेलाडीहरुले थप १५,०४० रुपैयाँ पाउने भएका छन् । अर्थात समग्रमा एउटा खेलाडीले ६५,०४० रुपैयाँ पाउने एन्फाले जनाएको छ । त्यस्तै यु–२० टोलीका मुख्य प्रशिक्षक उर्जन श्रेष्ठलाई ५० हजार दिइने निर्णय भएको छ ।

त्यसैगरी सहायक प्रशिक्षकद्वय ससेन्द्र धिमाल र राजु सिंह महर्जनले जनही २५–२५ हजार पाउने भएका छन् । साथै टिम म्यानेजर रबिन खड्का तथा टिम फिजियोथेरापिस्ट अनिष बुढाथोकीले पनि जनही २५–२५ हजार पाउने एन्फाले जनाएको छ ।

स्मरण रहोस, गत साता भदौ १२ गते एन्फा कम्प्लेक्समा भएको साफ यु–२० च्याम्पियनसिपको फाइनलमा नेपालले बंगलादेशसँग ४–१ को हार बेहोर्दै उपविजेतामा चित्त बुझाउन बाध्य हुनुपरेको थियो ।