काठमाडौं । फिफा विश्वकप २०२६ र एएफसी एसियन कप २०२७ को दोस्रो चरणको छनौट प्रतियोगिता खेल्ने तयारीमा रहेको नेपाली राष्ट्रिय फुटबल टोलीले शनिबार भएको एक मैत्रीपूर्ण खेलमा उत्कृष्ट जित हात पारेको छ ।

उत्कृष्ट जित निकाल्ने क्रममा नेपालले पहिलोपटक दोस्रो नेपाल सुपर लिग (एनएसएल) खेल्ने तयारीमा रहेको बिरगंज युनाइटेड फुटबल क्लबलाई ४–२ ले हरायो । नेपाली टोलीका लागि सन्जिव विष्टले दुई गोल गरे भने दिनेश हेन्जन र राजेश परियारले थप एक–एक गोल गरे ।

स्मरण रहोस, विश्वकप र एसियन कप छनौट अन्तर्गत समूह एचमा परेको नेपालले युएई, बहराईन र यमनसँग खेल्ने कार्यक्रम छ । नेपालले छनौट प्रतियोगिताको आफ्नो पहिलो खेल यही नोभेम्बर १६ तारीखका दिन दुबईमा युएईसँग खेल्ने कार्यक्रम छ ।