काठमाडौं । बहुप्रतिक्षित नेपाल सुपर लिग (एनएसएल) को दोस्रो संस्करणका लागि घानाका दुई खेलाडी टोरिक जेब्रिन र रफिक अमिनुले एफसी चितवनका लागि खेल्ने भएका छन् ।

चितवनले बिहीबार मात्रै आफ्नो आधिकारिक पेजमार्फत यी दुई खेलाडीलाई अनुवन्ध गरेको कुरा घोषणा समेत गरेको छ । यी दुवै खेलाडीले केही महिना अघि सम्पन्न शहिद स्मारक ए डिभिजन लिगमा फ्रेण्डस क्लबका लागि खेलेका थिए ।

स्मरण रहोस, एफसी चितवनको मार्की खेलाडीमा भने अनुभवी गोलरक्षक बिशाल श्रेष्ठ अनुवन्धित भईसकेका छन् ।

नेपाल सुपर लिगको खेलाडी लिलामी यही असोज १९ गतेका दिन हुँदैछ । प्रतियोगिता भने आउँदो मंसिर ८ गतेदेखि शुरु हुने आयोजक नेपाल स्पोर्टस एण्ड इभेन्ट म्यानेजमेन्ट प्रा.लि.ले यसअघि नै घोषणा गरिसकेको छ ।