बिर्तामोड । गत जेठ अन्तिम साता आयोजना गरिएको दोस्रो बिर्तामोड युनाइटेड च्यालेञ्ज कप फुटबल प्रतियोगिताको हिसाब आज सार्वजनिक गरिएको छ । प्रतियोगिता सकिएको १० दिनमै हिसाब सार्वजनिक गरिएको हो ।

बिर्तामोड युनाइटेड क्लबले आयोजना गरेको प्रतियोगितामा कुल खर्च १० लाख १६ हजार ६५१ रुपैयाँ भएको आर्थिक संयोजक आशिष चापागाईंले जानकारी दिए ।

उनका अनुसार प्रतियोगिता सञ्चालन गर्न आश्वासन दिइएको २ लाख ८५ हजार २५० रुपैयाँ प्राप्त हुन बाँकी रहेको छ । अहिले ४८ हजार ६२९ रुपैयाँ अपुग रहेको छ ।

बाँकी रहेको रकम प्राप्त भएपछि क्लबले २ लाख ३६ हजार ६२१ रुपैयाँ क्लबसँग बचत रहने प्रतियोगिता संयोजक अनिष सुवेदीले बताए । जेठ २४ गतेदेखि ३१ गतेसम्म आयोजित प्रतियोगितामा झापा र मोरङ ८ टिमको सहभागिता रहेको थियो भने अर्जुनधाराको शनिश्चरे एफसी च्याम्पियन बनेको थियो ।