बिर्तामोड । मोफसल कै प्रतिष्ठित मध्ये एक सातौं झापा गोल्डकप अन्तर्राष्ट्रिय आमन्त्रण नकआउट फुटबल प्रतियोगिता र गोलनेपाल डटकमबीच प्रत्यक्ष प्रसारणबारे सम्झौता भएको छ ।

यही माघ २४ गतेदेखि डोमालाल राजवंशी रंगशालामा हुन गईरहेको प्रतियोगिताको प्रसारण अधिकार र आधिकारिक मिडिया पार्टनरका रुपमा दुई पक्षबीच सम्झौता भएको हो ।

सम्झौतापत्रमा गोलनेपालको तर्फबाट गोलनेपालका कोशी प्रदेश प्रमुख रमेश समदर्शी र झापा गोल्डकपको आयोजकका तर्फबाट महासचिव बुद्ध तामाङले सम्झौतापत्रमा हस्ताक्षर र आदानप्रदान गरेका थिए ।

सोही अवसरमा नेपाली फुटबलमा पछिल्लो एक दशक बढी समयदेखि गाउँशहरका हरेक फुटबल खुराक पस्कन सफल गोलनेपालसँग सहकार्य गर्न पाउँदा आफूहरु उत्साहित रहेको आयोजक समितिका महासचिव बुद्ध तामाङले बताए । साथै उनले गोलनेपालसँगको सहकार्यले प्रतियोगितालाई थप नयाँ ढंगले उचाईंमा पुग्न टेवा मिल्ने विश्वास व्यक्त गरे ।

उता सोही अवसरमा गोलनेपालका कोशी प्रदेश प्रमुख रमेश समदर्शीले आफूहरुले पाएको जिम्मेवारी गहन रुपमा निर्वाह गरी प्रतियोगितालाई मोफसलदेखि देशविदेशसम्म भव्य बनाउन तथा चुस्त र दुरुस्त रुपमा सम्पन्न गर्न गोलनेपालको टिमले हरतरहको प्रयास गर्ने प्रतिवद्धता जनाए ।