काठमाडौं । एन्फा यु–१६ युथ लिग फुटबल प्रतियोगितातर्फ सोमबार मच्छिन्द्र फुटबल क्लब र मनाङ मस्र्याङ्दी क्लबले आ–आफ्नो खेलमा उत्कृष्ट जित हात पारेका छन् ।

सातदोबाटो स्थित एन्फा कम्प्लेक्समा भएको दिनको पहिलो खेलमा मच्छिन्द्रले त्रिभुवन आर्मी फुटबल क्लबलाई ५–० को अन्तरले हरायो । मच्छिन्द्रको जितमा अर्जुन कढायतले दुई गोल गर्दा प्रज्ञान राई, हिमाल थिङ र बिकास थापाले समान एक–एक गोल गरे ।

यो जितपछि ९ खेलबाट २० अंक जोडेको मच्छिन्द्र लिगतालिकाको दोस्रो स्थानमा उक्लिएको छ । उता पराजित आर्मी भने ६ अंका साथ पुछारतिर १२औं स्थानमा संघर्षरत छ ।

त्यस्तै सोमबार नै भएको दोस्रो खेलमा मनाङले जावलाखेल युथ क्लबलाई ३–१ ले पराजित गर्यो । मनाङको जितमा ईश्वर परियार, शिओम श्रेष्ठ र साकिन कुँवरले सामन एक–एक गोल गरे । उता जावलाखेलका लागि भने पुजन सुनारले एक मात्र गोल फर्काएका थिए ।

यो जितपछि ९ खेलबाट २० अंक जोडेको मनाङ पनि शिर्ष तीन कै होडमा छ । उता हार बेहोरेको जावलाखेल भने १० अंकका साथ लिगतालिकाको नवौं स्थानमा छ ।