काठमाडौं (एजेन्सी) । कतारमा सम्पन्न भएको एएफसी यु–२३ एसियन कपको उपाधि जापानले दोस्रोपटक जित्न सफल भएको छ । फाइनलमा गत संस्करणको उपविजेता उज्वेकिस्तानलाई शून्यका विरुद्ध १ गोलले हराउँदै जापान दोस्रोपटक च्याम्पियन बनेको हो ।

कतारी शहर अल–रयनमा भएको उपाधि भिडनतमा जापानका लागि अन्तिमतिर इन्जुरी समयमा फुकी यामादाले गरेको एक मात्र गोल ब्लु सामुराईलाई दोस्रोपटक विजेता बनाउन निर्णायक गोल बन्यो ।

यो नतिजासँगै एसियाबाट जापान, उज्वेकिस्तान र तेस्रो स्थान हासिल गरेको इराक यसै वर्ष पेरिसमा हुने पुरुष ओलम्पिक फुटबलका लागि सोझै छनौट भएका छन् ।

त्यस्तै चौथो स्थान हासिल गरेको इण्डोनेसियाले गुएनासँग प्ले अफ खेल्नेछ । सो खेलमा जित हात पार्ने टोलीले पनि पेरिस ओलम्पिकमा स्थान सुरक्षित गर्नेछ ।